დემონსტრაცია ომის წინააღმდეგ
ხმაურობს ქუჩა, გრიალებს ქუჩა,
ხმაურობს, როგორც თვითონ ჟორესი,
მზემ დაანათა, დასწვა, დარუჯა
უახლოესი და უშორესი.
ავტომობილის, ეტლის, ტრამვაის
აქ სვლა აღარ სცვლის ერთიმეორეს,
მშვენიერ მაისს, მომავალ მაისს
აწოდებს ხალხში მიმავალ ჟორესს.
ახალ სასახლის აღმავალ ხე-ტყეს
ზეცის დაჰხარის ლურჯი კამარა,
ვინემ თოთხმეტში - უფრო ძლიერ დღეს,
რომ გაისმოდეს თამამი „არა“!
ხმაურობს ქუჩა, გრიალებს ქუჩა
და მიდის, როგორც თვითონ ჟორესი,
ყვავილებს ისვრის გზად მუჭა-მუჭა,
დღეს უღრუბლოა ცა - უშორესი.
1935
საიტის "ექსკლიუზიური" მასალის გამოყენებისას აუცილებლად მიუთითეთ საიტის ლინკი!
სავტორო უფლებების დარღვევის შემჩნევის შემთხვევაში გთხოვთ დაუკავშირდით საიტის ადმინისტრაციას! litklubi@mail.ru