გინახავს? როგორ სხლტებიან,

მთის ცივ წყაროთა ჩქერებში,

ეს ვერცხლის კალმახებია,

მზეზე უბრწყინავთ ქერეჭი.

გინახავს? თუნდაც სიზმარში,

ლომ-ვეფხვთა სრბოლა კამარით,

რა დიადია ეს მარში,

რა ლამაზია ტრამალი...

ღელენი ზღვას მიერთვიან,

ლანქერს მიელტვის ლანქერი,

წვეთი კლდის თავზე _ წვეთია,

გადმოხტება და _ ჩანჩქერი!

ხმალი ომშია მაგარი,

წყალი ტბორია ნადგომი...

ყველა დამდგარი _ საწყალი,

ნახტომი, სულო, ნახტომი!..

პირი ვიბრუნე მთისაკენ,

დიდხანს არც აქ ვარ დამდგომი...

ნახტომი სიკეთისაკენ,

ნახტომი, კიდევ ნახტომი!..

 

1994