ერთი მილიდან ამოდის ბოლი,

დგას და ისვენებს მეორე მილი,

ეს არის მილი, იმ მილის ცოლი,

ხოლო ის მცირე მილია – შვილი.

ისინი თითქოს მიდიან სადღაც,

აქედან მოჩანს ტყისპირი მწვანე,

ნაგავი ყრია ფაბრიკის ახლოს,

ეს ჩანს სარდაფით, სადაც ლუდს სვამენ.

ერთია – რუსი, სომეხიც – ერთი,

ორი ქართველი და ერთიც ქურთი,

ქალი კი ვაჭრობს თევზით და მკერდით,

და ქურდის ქურდი არაა ქურდი.

რას შეალიე ცხოვრება მთელი?

ვაი, არაყიც უკვე არ გათრობს;

ზანტად აიღო ვიღაცამ წელი

და სარდაფიდან გავიდა მარტო.

გქონდა სოფელი, ეზო და კარი,

და საალერსო სახელიც გერქვა;

დამლაგებელი მოვიდა ქალი

და სუფრის ნარჩენს დაუწყო ქექვა.

– ვკეტავთ! – გაისმა ბრძანება ცივი,

დამლაგებელმა ჩააქრო შუქი;

სადღაც წავიდა ის ერთი მილიც

და შეაქცია საღამოს ზურგი.