გვქონდა პირობა მიცემული ერთმანეთისთვის - 

გვსურდა შეხვედრა, უფრო მეტად ჩადენა ცოდვის.

ინსტიქტებს ვენდეთ -

და ასეთი პირობა იყო:

A და B პუნქტებიდან ჩ პუნქტისაკენ 

ერთმანეთის შესახვედრად და ასე შემდეგ...  

ჰოდა, ჩვენც შევხვდით -

დათქმულ დროს და ზუსტად ჩ პუნქტში,

(ასეც ვიცოდი) -

ჩ  პუნქტია შუა წერტილი!

A და B ბოლო წერტილები გადავდეთ გვერდზე,

ჩამოვაფარეთ რიდე სარკეს, 

რომელიც ადრე გვირეკლავდა ცალკე პუნქტივით

და მას შემდეგ ამაოდ გვეძებს.

ჩვენი სუნთქვის დიალოგის გავუშვით ტიტრი

და დავრჩით ჯამი: ერთს + ერთი,

ორის ვალსი... ისე მოვეშვით, ახლაც ვარკვევთ ,

თურმე რამდენ ხანს გვიძებნია საერთო რიტმი.

მოცემულობის თანახმად კი დაგვრჩა შემდეგი:

ჩ პუნქტიდან A და B პუნქტებისკენ და ასე შემდეგ... 

კითხვის დასმამდე თავს ვიკავებთ, მერე კი ვხვდებით:

პასუხებიდან რომ არცერთი არ არის სწორი!

პუნქტი A და B, ვცხოვრობთ ცალ-ცალკე,

სახლები მშვიდი, მთვარე მოხრილი

სანამ დრო არის - ცოტა მაცადე -

ჩ ქოხს ავაგებ ერთად ყოფნისთვის!