იესო, იეშუა...

გაჭედილი ვარ სადღაც -

ცხადსა და სიზმარს შუა.

აქეთ, მაქეთ თუ სხვაქეთ -

გამოსავალი თუა?!

ძმაო, მამავ და ღმერთო -

იესო, იეშუა...

გეძახდი, მაგრამ მივხვდი -

დამძახებელი ყრუა.

თორემ ხმის გაცემაზე

ხომ არ იტყოდი უარს.

ძმაო, მამავ და ღმერთო -

იესო, იეშუა...

მომენატრები ისე,

ვით მშიერს პურის ყუა,

ვით ადამს სამოთხეთი,

ეშმამ რომ გამოსტყუა.

ძმაო, მამავ და ღმერთო -

იესო, იეშუა...

გენდე და, - მენდე, თუმცა

კაცი ყოველი ცრუა.

დაშრა შუბლს ქვემოთ, სადაც

ორი პატარა რუა.