რომ არა გძულვარ - ცოტაა,
დღეს საჭიროა მეტი;
უნდა გიყვარდე, მონტეგ,
ლამაზი კაპულეტი!
რა შუაშია მოყვრობა, -
„ჩულჩუტი“ ჯულიეტა;
ვინც სადმე კაპულეტია,
უნდა გიყვარდეს, მონტეგ!
თორემ ქაფქაფა რიოში
მოდის და მოყელყელაობს;
ვიღაც ჩამდგარა მღვრიეში, -
ამინდია და, - ხელაობს.
შემოგვიშენებს ტიხარს
ათასი აბუეტი;
ხვდებიან - მონტეგი ხარ!
მე კიდევ - კაპულეტი!
უჩინო გვარებით და
უფულოსაფულეთი -
შენ მაინც მონტეგი ხარ!
მე მაინც - კაპულეტი!
ამოკემსილი თიხა
ნერვების კაპუეტით -
რას იზამ... მონტეგი ხარ!
მე კიდევ - კაპულეტი!
უკვე მოგვბეზრდა ქვეტექსტის
წლების წიაღში დება;
ვიცი, შენ ხვდები ყველაფერს...
ყველა მონტეგი ხვდები.
რომ არა გძულვარ, - ცოტაა,
დღეს საჭიროა მეტი;
ვინც სადმე კაპულეტია,
უნდა გიყვარდეს, მონტეგ!
ვიღაც ჩამდგარა მღვრიეში, -
ამინდია და , - ხელაობს;
მოჰქუხს ჭუჭყი რიოში,
მოჰქუხს ჭუჭყი და მოყელყელაობს.
სევდის უფსკრულში გდიხარ
სისხლიან ამულეტით...
დიახ! - შენ - მონტეგი ხარ!
დიახ! - მე - კაპულეტი!