ქ. ს-ს

ო... არ იფიქროთ, რომ ლამაზების

მწვავს სიყვარული ან სიძულვილი:

მე მხოლოდ ძველი დღის დაფასების

და გახსენების მქონდა სურვილი.

და აი გუშინ, როცა კარადის

თაროსთან წიგნებს ვეძებდი დილით,

უეცრად ვნახე თქვენი ბარათი,

თქვენსავით მკრთალი და ფერმიხდილი.

- გილოცავ, ძმაო, ბედნიერ მყობადს, ―

ჩამჩურჩულებდა ნაზად წერილი

და მომაგონდა ჩვენი ბავშვობა,

აწ გარდასული და გაფრენილი.

ო… არ იფიქროთ, რომ ლამაზების

მწვავს სიყვარული ან სიძულვილი:

მე მხოლოდ ძველი დღის დაფასების

და გახსენების მქონდა სურვილი.

1937