პატარა ვარ მაგრამ მაინც,

სახლში ბევრი საქმე მელის,

დღეს თოჯინას ვაცმევ კაბას,

ფერებიანს ცისარტყელის.

ხვალ პატარა იხვის ჭუკებს,

ჩავსვამ წყალში, ვაბანავებ,

და ძილის წინ მოვუყვები,

ჩვენს ფისოზე ახალ ამბებს.

- დღეს ცოტათი მოვიწყინე...

(ჩუმად მისმენს ჩემი მურა) -

სიყვარულის სუნი გაქვსო, - 

დედამ ყურში ჩამჩურჩულა.

არც ბაჭიამ, არც დათუნამ,

არც იმ მურამ, ძირს რომ იჯდა,

რა სუნია არ იციან,

საფიქრალი გამომიჩნდა.