(რა თქმა უნდა, ხუმრობით)

მომწონს თქვენი სიყვარული -

ეიფელის ოდენა,

მაგრამ უცებ მახსენდება

თქვენი გილიოტინა:

ვინც კი თავდადებულების

მზე აქო და ცა აქო

და ვინც თავი გამოიდო,

ყველამ თავი წააგო.

ხოლო ვინც თავს ევლებოდა

სამართლიან მოტივებს,

თავი გაამეტებინეს -

გააგილიოტინეს.

არ ცდებოდნენ, ასხვავებდნენ

უთავოს და თავიანს,

რადგან ტანი - დანარჩენი -

თავის ზედსართავია...

იცინოდა სიხარული,

სიყვარული ტიროდა,

ბევრი დარჩა - თავმოჭრილი

უგილიოტინოდაც...

თუ დაგჭირდეს, რას მიქვია

თმა და თვალი - გიშერი:

შენი გილიოტინა და

ჩემი - კისერი!